MANILA, Philippines – Para sa pagkakasunud-sunod ng partylists dahil karamihan ay nagsisimula sa letrang “A” at “1” ay idadaan sa raffle ng Commission on Elections (Comelec) ang order of listings.
Batay sa Resolution No. 10025, magsasagawa ang poll body ng raffle para matukoy ang pagkakasunud-sunod ng pangalan ng mga party-list groups sa official ballots na gagamitin sa May 2016 elections.
Nasa 185 party-list groups ang makakasali sa raffle na isasagawa sa Disyembre 14, na kinabibilangan ng 101 party-list groups, na ang aplikasyon ay naaprubahan na ng Comelec at 84 party-list organizations, na-deny ng dibisyon ngunit may mga nakabinbing apela sa en banc.
Tinitingnan pa rin ng Comelec ang posibilidad na madagdagan pa ng walo pang partylists na makakasama sa raffle subalit subject for resolution pa ang iba’t ibang isyu na kanilang kinakaharap.
Gumagamit ng alphabetical order ang Comelec para sa pagkakasunud-sunod ng pangalan ng mga grupo sa balota, ngunit karamihan sa mga ito ay gumagamit ng letrang A at numero 1 para mauna ang kanilang pangalan sa listahan.