Ambush: 4 bulagta, 1 kritikal

MANILA, Philippines – Dalawang opisyal ng barangay at dalawang iba pa ang napatay matapos pagbabarilin ng mga di-kilalang kalalakihan sa bahagi ng Gandara River sa bayan ng Gandara, Samar noong Biyernes ng umaga.

Kabilang sa mga napatay ay sina Kagawad Michael Ocong, 41; Kagawad Alvin Casal­jay, 25, mga nakatira sa Barangay Beslig; Pepe Ocong, 55, asawa ni Chairwoman Maria Ocong; at ang 18-anyos na si RR Ocong.

Kritikal naman ang 49-anyos na si Aquino Ocong na kasaluku­yang isinaialim sa close security ng pulisya na sinasabing makapagbibigay ng impormasyon sa pagkakakilanlan ng mga suspek.

Sa police report, nag­lalayag ang mga biktimang lulan ng motorized banca sa Gandara River patungong town proper nang ratratin ng grupo ng kalalakihan.

Nakaabot naman sa himpilan ng pulisya ang naganap na insidente matapos ipagbigay-alam ni Sgt. Cortez ng Cafgu Detachment ang impormasyon mula kay Barangay Tanod Tito Lomentigar ng Barangay Beslig.

Kinumpirma naman ni Samar Governor Sharee Ann Tan na ang mga biktima ay kanyang tagasuporta subalit hindi nagbigay ng komento kung may kaugnayan sa politika ang pana­nambang.

Sinisilip naman ng pulisya ang anggulong may kinalaman sa pagpatay kay Barangay Chairman Alex Reposar at kanyang anak na batang lalaki at driver ng motorized banca noong nakalipas na taon ang naganap na pagpatay kay Ocong. Freeman News Service

Show comments