MANILA, Philippines - Naratay sa ospital ang apat na empleyado ng isang resort matapos silang malason sa tinapay na may halong shabu na ibinigay ng isang kustomer kamakalawa sa San Fabian, Pangasinan.
Ang mga biktima ay kinilalang sina Dessy Ann Buado,19, front desk; Leonora Sumera, 68, biyuda, chef cook; Analyn Monila, 26 at Leliosa Grampa, 33.
Batay sa ulat, bago nangyari ang insidente dakong alas-11:00 ng gabi sa Moonylight Bay Resort sa Brgy. Tiblong, San Fabian, Pangasinan ay binigyan ang mga biktima ng tinapay ng kustomer nilang si Archie Bautista, 30.
Ilang saglit matapos na makain ang tinapay ay nagsimula nang mahilo, magsuka, sumakit ang ulo at tiyan ng mga biktima bunsod upang isugod ang mga ito sa Region 1 Medical Center sa Dagupan City.
Nang isailalim sa laboratory test ang nasabing tinapay ay nabatid na may halo itong shabu kaya’t inaresto ang suspek na nahaharap kaso ng paglabag sa illegal drugs.