MANILA, Philippines - Nasawi ang isang babae habang umaabot na sa 32 katao ang nasugatan makaraang sumabog ang bomba na itinanim sa loob ng isang pampasaherong bus sa Labuan terminal, Zone 1, Zamboanga City kahapon.
Sa ulat na nakarating kay SPO2 Alex Mabalot, Public Information Officer ng Zamboanga City Police, dakong alas-2: 25 ng hapon nang maitala ang pagsabog sa loob ng Biel Transit na may body number 1641 sa Morga Compound, Calixto Street, Zone 2 ng lungsod.
Ang mga biktima na pasahero ay mabilis na isinugod sa iba’t ibang pagamutan sa lungsod kung saan isang hindi pa nakilalang babae na tinatayang nasa 20-anyos ang nasawi.
Ang nasabing bus ay galing Brgy. Labuan at kararating lamang sa nasabing terminal at kasalukuyang nagbaba ng mga pasahero ang bus nang sumambulat ang bomba na itinanim sa loob nito ng hindi pa natukoy na mga suspek.
Ang insidente ay lumikha rin ng sunog sa loob ng bus kung saan nagresponde ang mga bumbero at maging ang Scene of the Crime Operatives (SOCO) team na ikinordon ang lugar.