Limang preso hinatulan ng habambuhay na pagkabilanggo

MANILA, Philippines – Habambuhay na pagkabilanggo ang hinatol ng korte kamakalawa sa limang preso na nahuli sa aktong nagpa-pot session sa banyo ng kanilang selda sa Makati City Jail noong 2013.

Sa limang pahinang desisyon na ipinalabas ni Judge Giwa Bibat-Palamos, ng Makati City Regional Trial Court (RTC), Branch 64, habangbuhay na pagkabilanggo ang naging hatol sa mga akusadong sina Benjamin De Leon III; Christopher Valderama; Gerardo Labini; Benjamin Dongon at Dennis Santos, pawang mga inmates ng Makati City Jail dahil sa kasong may kinalaman sa droga.

Bukod sa pagkabilanggo ay pinagbabayad din ng hukuman ang mga akusado ng tig P500,000.00 bawat isa bilang danyos perwisyo.

Batay sa record ng korte noong Abril 25, 2013, alas-3:15 ng hapon sa loob ng comfort room ng dormitory 4, Makati City Jail ay nagsasagawa ng sorpresang operasyon sina SJO4 Ramon T. Carolino at JO1 Arnold Maciste at naaktuhang nagsasagawa ng pot-session ang mga akusado na nakumpiskahan ng ilang plastic sachet ng shabu at mga paraphernalias.