Drug runner nilikida

MANILA, Philippines - Isang obrero na umano ay runner ng shabu ang binaril sa mukha habang nanonood ng telebisyon sa Malabon City, kamakalawa ng gabi.

Namatay noon din ang biktima na nagtamo ng tama ng bala ng kalibre 9mm sa ilong na tumagos sa likod ng ulo na si Jose Ricky San Juan, 41, ng Dulong Ugnatan Street, Brgy.  Concepcion, ng naturang lungsod.

Batay sa ulat, dakong alas-10:20 ng gabi ay nanonood ang biktima ng kanyang bagong bili na telebisyon nang sumulpot ang hindi nakilalang suspek sa bintana at agad na pinaputukan ang biktima. 

Nadala pa ang biktima sa  Pagamutang Bayan ng Malabon ngunit hindi na ito umabot ng buhay.

Ayon sa misis ng biktima na napilitan ang kanyang mister na magpagamit sa sindikato bilang tagabili ng shabu sa kanilang lugar dahil sa hirap ng buhay.