Sa paggunita ng Semana Santa… PNP nasa ‘heightened alert’ na
MANILA, Philippines - Upang matiyak ang kaligtasan ng publiko, isinailalim na kahapon sa heightened alert status ang Philippine National Police (PNP ) kaugnay ng paggunita sa Semana Santa.
Sinabi ni Philippine National Police Spokesman Chief Supt. Generoso Cerbo Jr., nasa heightened alert ang kapulisan sa Luzon at Visayas Region at ipauubaya na sa mga Regional at Provincial Directors ang pagsasailalim sa full alert status depende sa security assessment sa mga lugar na kanilang hurisdiksyon.
Samantalang ang Mindanao Region ay dati ng nasa full alert status kaugnay ng anti- terrorism campaign ng PNP at AFP.
Aniya, 90% ng kapulisan ay nakaalerto para tiyakin ang matiwasay at mapayapang paggunita sa Semana Santa o ang panahon ng pagtitika sa Simbahang Katoliko. Ito ang ikalawa sa pinakamataas na alerto na ipinatutupad ng PNP kaya nangangahulugang kanselado ang bakasyon ng mga pulis.
Sa tala, 80 % ng populasyon ng Pilipinas ay mga deboto ng Simbahang katoliko kaya naman palalakasin ang police visibility mobile patrol sa bisinidad ng mga simbahan, public transport terminal, paliparan, mga matataong lugar na dinarayo ng mga turista sa panahon ng Mahal na Araw tulad ng mga malls, beach resort, parks at iba pa.
Kaugnay nito, nagpaalala naman ng “safety tips” si Chief Supt. Nestor Quinsay, Director ng Police Community Relations Group (PCRG) sa mga Pinoy na magsisipagbakasyon o magtutungo sa mga probinsya sa Semana Santa na ihabilin sa kanilang mga kapit-bahay ang kanilang maiiwang tahanan upang hindi mabiktima ng Akyat Bahay Gang.
Karaniwan na aniya na nagsasamantala ang mga kawatan sa mga ganitong panahon na nagbabakasyon ang karamihan. Dapat din na iwanan ng matatapang na aso ang bahay.
- Latest
