MANILA, Philippines – Iniwan ng isang walang pusong ina ang umano’y kanyang bagong silang na sanggol na babae sa isang istasyon ng Metro Rail Transit (MRT) sa Makati City kamakalawa.
Sa pahayag ng mga sekyu ng MRT na sina Mark Anthony Montes at Lucio Pa-ano Jr., dakong alas-2:30 ng hapon nang matagpuan nila sa hagdanan ng Southbound lane, EDSA Avenue ang sanggol na babae na tinatayang nasa dalawang linggo pa lamang ang gulang.
Nabigo ang pamunuan ng MRT Magallanes Station na matukoy ang pagkakakilanlan ng suspek na nag-iwan nito dahil sa walang nakakabit na CCTV camera sa naturang lugar.
Agad na dinala sa Barangay Bangkal Lying-in Center ang sanggol na ngayon ay nasa mabuti nang kalagayan.