MANILA, Philippines – Kapwa nasawi ang isang magkapatid habang nasa malubhang kalagayan naman ang dalawa nilang pinsan matapos na malason sa iniulam na isdang butete sa kanilang hapunan kamakalawa sa Datu Blah Sinsuat, Maguindanao.
Idineklarang dead on arrival sa Cotabato Regional and Medical Center ang mag-utol na sina Benny Orbano, 18 at Coco Orbano,15, residente ng Brgy. Binansalan ng bayang ito.
Patuloy namang inoobserbahan sa pagamutan ang dalawang pinsan nila na nagkakaedad 11 at 4 anyos.
Batay sa ulat, nahuli ng mga biktima ang isdang butete na napadpad sa tabing dagat na kanilang iniuwi saka ipinirito.
Dakong alas-7:00 ng gabi ay kinain ng mga ito ang butete na ulam sa kanilang hapunan.
Ilang oras matapos na makain ang butete ay nakaranas ng pananakit ng tiyan, pamamanhid ng katawan, matinding sakit ng ulo, pagsusuka at pagdudumi ang mga biktima bunsod upang isugod ang mga ito sa pagamutan pero nabigo ng masagip ang magkapatid.
Kumuha na ng sample ang mga health officials ng isdang butete na ulam ng mga biktima upang madetermina ang level ng toxin o lason na nakuha ng mga ito.