Jeep bumaliktad: 1 todas, 12 sugatan

MANILA, Philippines – Idineklarang dead-on-arrival sa pagamutan ang isang 18-anyos na konduktor ng jeep, habang nasugatan ang 12 katao matapos na bumaliktad ang sinasakyan nilang pampasaherong jeep sa kahabaan ng Marcos Highway, boundary ng Antipolo City at Cainta lalawigan ng Rizal.

Ang namatay ay kinilalang si John Mark Duldulao, binata, ng P. Oliveros St. Antipolo City.

Sa ulat, dakong alas-9:45 ng gabi ay matulin umanong bumabaybay ang jeep (DWW-624) na minamaneho ni Jefferson Estrada at pagsapit sa palikong kalsada ay tumaob ito.

Dahil sa nakasabit si Duldulao na siyang konduktor ng jeep ay labis itong napuruhan at dinala sa Amang Rodriguez Memorial Medical Center, subalit namatay ito sa daan pa lamang.