MANILA, Philippines – Namatay habang ginagamot sa pagamutan ang tatlong katao kabilang ang isang mag-ama nang sila ay pagbabarilin kamakalawa ng mga armadong kalalakihan sa Lamitan City, Basilan.
Ang mga nasawi ay kinilalang sina Alen Pioquinto, at mag-amang sina Noel Alvarez at anak nitong si Nolie Alvarez.
Sa ulat ng Lamitan City Police, bago naganap ang pamamaril bandang alas- 4:30 ng hapon ay galing sa pamumutol ng kahoy ang tatlo na pawang “chainsaw operator” nang tambangan ng mga armadong suspek habang sakay ng motorsiklo.
Ang mga biktima ay residente ng Zamboanga City at pumunta lamang sa Basilan dahil sa kanilang hanapbuhay bilang mga ‘chainsaw operator’.
Matapos mapatay ay tinangay ng mga suspek na pinaghihinalaang mga bandidong Muslim ang mga kagamitan at motorsiklo ng mga biktima.