MANILA, Philippines – Pinagtulungang patayin sa taga ng tatlong magsasaka ang isa nilang kabaro kamakalawa ng gabi sa Brgy. Kabulusan, Magallanes, Cavite.
Ang biktima na nagawa pang masambit ang mga pangalan ng suspek bago malagutan ng hininga ay si Michael Espineli, 34-anyos, may-asawa.
Ang mga suspek na agad nadakip ay kinilalang sina Binoe Leonor 18; Eric Ariola, 20; at Roilan Salorsano, 30, pawang mga kasamahan ng biktima at residente din ng nasabing lugar.
Sa ulat, dakong alas-9:00 ng gabi nang matagpuan ang biktima na duguan at tadtad ng mga taga at saksak sa iba’t ibang bahagi ng katawan ng isang residente.
Tinulungan nito ang biktima habang dinadala sa pagamutan ay nasambit pa nito ang mga pangalan ng suspek bago ito tuluyang nalagutan ng hininga.
Nagsagawa ng follow-up operation ang pulisya at isa-isang naaresto ang mga suspek sa kani-kanilang bahay.
Nabatid na una umanong tumaga si Leonor gamit ang kalawit at katulong ang dalawa pang suspek.