Bulto-bultong marijuana nasamsam
MANILA, Philippines - Nasamsam ng pulisya ang bulto-bultong pinatuyong dahon ng marijuana na aabot sa halagang P6 milyon mula sa dalawang tulak sa ikinasang buy-bust operation, kamakalawa ng umaga sa Caloocan City.
Kinilala ng pulisya ang mga nadakip na suspek na sina Junel Rugon, 18-anyos, ng Zapote Road, Brgy. 174; at si Aiza Manilag, 23, may-asawa, Block 17 Lot 12 Rose Street, Brgy. 172, ng naturang lungsod.
Nabatid na nagsagawa ng anti-drug operations group ang pulisya sa tapat ng gate ng Villa Magdalena 3, Brgy. 172. Unang nakuha sa mga suspek ang isang bag na naglalaman ng mga brick ng marijuana. Nang puntahan ang inuupahang apartment ni Manilag, nadiskubre ang 18 stokes ng marijuana at 28 bricks ng marijuana aabot sa timbang na 60 kilo at halagang P6 milyon at isang timbangan na gamit naman sa pagre-repack nito.
Hindi naman sinabi ng mga suspek kung saan galing ang marijuana at itinanggi rin ng may-ari ng apartment na alam niya na ginagawang imbakan ng marijuana ang kanyang unit.
Kasong paglabag sa Dangerous Drugs Act of 2002 ang isasampa sa mga suspek habang isinasagawa ang imbestigasyon .
- Latest
