MANILA, Philippines - Malapitang binaril sa ulo ng hindi pa kilalang suspek ang isang 32-anyos na lalaki habang ito ay naglalakad kahapon ng umaga sa Parola Compound, Tondo, Maynila.
Ang nasawi ay kinilalang si Jojo Pradas, ng 13th St., Damayan Lagi, E. Rodriguez, Quezon City,.
Batay sa ulat, dakong alas-11:00 ng umaga ay naglalakad ang biktima malapit sa Area-H, Gate 64, Parola Compound, Tondo, Maynila nang ito ay hatakin ng hindi pa kilalang suspek at malapitang binaril sa ulo.
Kahit nakabulagta ay pinagbabaril pa rin ito upang siguraduhin, hindi na mabubuhay pa.
Ayon sa pulisya, na madalas dumayo sa lugar ang biktima at tumutuloy pansamantala sa isang alyas “Jocelyn” ng dalawa hanggang 3 araw.
Sa imbestigasyon ay nakadispalko umano ang biktima sa pinagbentahan nito ng shabu, subalit makulit umano itong kumuha pa rin ng maibebentang droga.