MANILA, Philippines - Walang awang binaril ng isa sa tatlong holdaper na nakamotorsiklo ang isang supervisor matapos na makuha ang kailangan ng mga ito kahapon ng madaling-araw sa Quezon City.
Ang biktima na idineklarang dead-on-arrival sa pagamutan dahil sa tama ng bala sa likod na tumagos sa sikmura ay kinilalang si Joman Porras, 30, supervisor ng Gerardo’s Bar and Restaurant.
Batay sa ulat, dakong alas-2:30 ng madaling-araw ay naglalakad si Porras kasama ang cashier na si Jean Mata sa kahabaan ng Panay Avenue, kanto ng Sgt. Esguerra St., Brgy. South Triangle para umuwi sa kanilang bahay sa Antipolo City nang dumating ang dalawang motorsiklo ng mga suspek.
Huminto ang mga suspek at sa pagbaba ng motorsiklo ay tinutukan ng mga baril ang dalawang biktima at nagdeklara ng holdap.
Walang nagawa si Mata nang kunin ng mga suspek ang kanyang bag na naglalaman ng P5,000 cash, isang unit ng Samsung galaxy mobile phone, at assorted na identification cards.
Matapos nito ay sinunod na kinorner ng mga suspek si Porras habang ang isa sa kanila ay nasa gilid ng biktima at may hawak ng baril.
Ilang sandali, walang sabi-sabing na binaril ng isa sa mga suspek si Porras, saka mabilis na sumakay ng kani-kanilang mga motorsiklo patungong Edsa.