MANILA, Philippines - Pinagbabaril ang dalawang Indian national ng dalawang lalaki na sakay ng isang motorsiklo na ikinasawi ng isa at malubhang pagkasugat ng isa pa kamakalawa sa Calabanga, Camarines Sur.
Idineklarang dead on arrival sa ospital dahil sa tama ng mga bala sa katawan ang biktimang si Navjot Singh, 26, ng Peralta St., Villa Sorabella Subdivision, Concepcion Grande ng Naga City.
Habang nilalapatan ng lunas sa pagamutan ang kasamahan nitong si Lakhwinder Singh, 33.
Sa ulat, alas-11:26 ng umaga ay nag-uusap ang dalawa sa kahabaan ng Zone 4, Brgy. San Roque, Calabanga, Camarines Sur nang biglang sumulpot ang dalawang lalaki na sakay ng isang motorsiklo at pinagbabaril pagkatapos ay mabilis na nagsitakas.
Isinugod sa pagamutan ang dalawang biktima ng kaibigang si Paramjit Singh, pero nabigo ng maisalba ang buhay ni Navjot.
Inaalam ng mga otoridad ang motibo nang pananambang at sino ang mga suspek.