MANILA, Philippines - Patay ang isang kargador makaraang pagtulungang saksakin ng mag-utol na kapwa kargador rin dahil sa pang-aagaw umano ng biktima ng kanilang suki, kahapon ng madaling araw sa Malabon City.
Agad na nasawi dahil sa maraming tama ng saksak sa katawan ang biktimang nakilalang si Anthony Mahinay, 46-anyos, residente ng Letre, Brgy. Tonsuya, ng naturang lungsod.
Isinugod naman sa Tondo Medical Center ang magkapatid na suspek na sina Dominador, 37 at Jimmy Peñaranda, 42, kapwa ng Sta. Maria, Bulacan, makaraang magtamo rin ng mga sugat sa insidente.
Sa ulat ng Malabon Police, ala-1:20 ng madaling araw kahapon nang sitahin ni Dominador ang biktima sa loob ng Malabon Public Market sa Estrella Street, Brgy. Tañong, dahil sa ginawang pang-aagaw umano sa kanyang suki.
Nauwi ito sa mainitang pagtatalo hanggang sa mauwi ito sa suntukan. Nakita naman ni Jimmy ang pangyayari at sinaklolohan ang kapatid. Isa sa mga ito ang nagbunot ng patalim at pinagsasaksak ang biktima.