MANILA, Philippines - Tigok ang isang 40-taong gulang na barangay tanod habang sugatan ang isang binatilyo makaraang pagbabarilin sa Malate, Maynila, kamakalawa ng gabi.
Ilang oras pang sinubukang gamutin subalit bumigay din ang katawan ng biktimang si Ariel Que, ng M. AdriaÂtico St., Malate, barangay tanod ng Brgy. 204, Zone 77, District 5, habang patuloy na inoobserbahan sa Ospital ng Maynila ang 13-anyos na si Jude Anthony Tomnog, ng #2915 Madre Ignacia St., Malate.
Pinaghahanap na ang suspek na nakilala lamang sa pangalang Sorab Vallo, nasa 20 hanggang 25 ang edad, may taas na 5’5 hanggang 5’7 at nakatira rin sa nabanggit na lugar.
Sa ulat ni SPO2 Glenzor Vallejo ng Manila Police District-Homicide Section, dakong alas-7:00 ng gabi noong Sabado nang abangan ng suspek ang biktima sa paglabas ng bahay at nang mamataan ay sunod-sunod na pinaputukan. Nang makita ni Christopher, anak ng biktima, ang nagyari sa ama ay agad na dinala sa Ospital ng Maynila. Bandang alas-11:00 ng gabi nang ideklara ni Dr. Sheena Shane Feliciano ng OSMA na binawian na ng buhay ang biktima.
Nabatid na sinita at pinagalitan ng biktima ang nobya ng suspek dahil palaging nakatambay sa kanilang lugar na inaabot ng hatinggabi.