MANILA, Philippines - Nauwi sa malagim na trahedya ang pagpunta ng limang miyembro ng isang pamilya sa isang family reunion matapos na bumangga ang kanilang sinasakyang tricycle sa kasalubong na van kamakalawa sa highway ng Brgy. San Felipe, Tantangan, South Cotabato.
Namatay noon din ang mga biktimang sina Em-em Amad, 34-anyos; Johnny Amad, Joyce Amad, 30-anyos; dalawang bata na isang 4-anyos na batang babae at isang 1-anyos na batang lalaki.
Pito naman ang nasugatan na lulan rin ng tricycle na isinugod sa pagamutan.
Batay sa ulat, pasado alas-9:00 ng umaga ay lulan ang mga biktima kasama ang iba pang mga kamag-anak ng tricycle at patungo sa bayan ng Tampakan para dumalo sa reunion.
Pagsapit sa hangganan ng highway ng Purok 3 at 4, Brgy. San Felipe, Tantangan, South Cotabato ay nabangga ito ng kasalubong na Mitsubishi Delica Van na minamaneho ni Lorenzo Llaneras, 53-anyos.
Sa lakas nang pagkabangga ay tumilapon ang ibang biktima habang ang iba ay naipit matapos mayupi na parang lata ang tricycle.
Sa inisyal na imbestigasyon ay masyadong umanong mabilis ang takbo ng tricycle na nagbunsod sa malagim na sakuna.
Arestado naman ng mga nagrespondeng pulisya ang driver ng Mitsubishi na nahaharap sa kasong reckless imprudence resulting to multiple homicide at multiple frustrated homicide.