MANILA,Philippines - Magkasamang nasawi ang isang mag-asawang matanda matapos na sila ay pagbabarilin sa loob ng kanilang silid ng hindi pa nakilalang mga armadong kalalakihan na puwersahang pumasok sa kanilang bahay sa Brgy. Guadalupe, Carcar City, Cebu.
Ang mga nasawi ay kinilalang sina Renerio Neri at misis nitong si Dolores; kapwa 83-anyos, kapwa negosyante na nagmamay-ari ng 9 pampasadang jeepney at malawak na lupain.
Sa ulat ng Carcar City Police, pasado alas-4:15 ng hapon nitong Nobyembre 18 nang madiskubre ang bangkay ng mag-asawa sa loob ng kanilang bahay sa Sitio Sanggi, Brgy. Guadalupe ng lungsod.
Kasalukuyan namang iniimbestigahan ang alitan sa lupa at pagnanakaw ang motibo ng pamamaslang sa mag-asawang matanda.
Sa pahayag ng mga kapitbahay ng mag-asawa sa mga otoridad, nagtataka umano sila kung bakit hindi lumalabas ng kanilang bahay ang mag-asawa kung kaya’t napilitan silang mag-usisa at laking gulat nila ng makitang duguan ang mga itong nakabulagta sa kanilang silid.
Posibleng anya noong Biyernes pa ng gabi o noong Sabado ng madaling-araw naganap ang pamamaslang.