Mga bahay sinuwag… Mag-ama, 1 pa todas sa trak

MANILA, Philippines - Isang trak na nawalan ng preno ang sumuwag sa mga kabahayan na nakatirik malapit sa highway na ikinasawi ng isang mag-ama at isang pasahero habang sampu ang nasugatan naganap kamakalawa ng gabi sa highway ng Upper Puerto, Cagayan de Oro City.

Kinilala ang mga nasa­wing sina Mario Bahe, anak na si John Lord at pasaherong si Mario Aluya na naipit sa loob ng ka­baha­yang gawa sa mahihinang uri ng materyales matapos salpukin ng isang cargo truck.

Isinugod naman sa pa­gamutan ang mga na­su­gatang sina Jayson Se­roy; Adonis Anoos; Anto­nio Rosario; Marvin Canedo; Elena Jane Canedo at ang dalawang buntis na si Ge­raldine Canedo at Merlyn Canedo na kapwa nasa kritikal na kondisyon at iba pa na hindi natukoy ang mga pangalan.

Batay sa ulat ng Caga­yan de Oro City Police, bandang alas-6:00 ng gabi nang maganap ang trahedya sa tabi ng Maharlika Highway sa nasabing lugar.

Nabatid na may kargang mga bato ang cargo truck (YCM 801) na mi­namaneho ni Ponciano Manipis nang mawalan ito ng preno at tuluy-tuloy na sinu­yod ang magkakatabing kabaha­yan.

Inamin ni Manipis na nawalan umano ng preno ang truck na nagbunsod sa malagim na trahedya.

Kinasuhan si Manipis ng reckless imprudence resulting to 3 counts of homicide, multiple to serious physical injuries at damage to property.