Whoa! Gilas belles!

Hindi natapos sa historic silver-medal feat sa FIBA 3x3 Asia Cup ang asenso ng Gilas Women.

Ilang araw lang ang lumipas, bumalik ang Phl belles sa Singapore, at dalawang beses pinadapa ang host team upang sumungkit ng pwesto sa FIBA 3x3 World Cup sa Warsaw, Poland sa Hunyo.

Naging top team sa Asia at World Cup bound kasama ang world giants. Kasunod na ang 2028 Los Angeles Olympics?

“I can’t praise them enough. They not only exceeded expectations but also demonstrated that it’s possible,” ani Samahang Basketbol ng Pilipinas president Ricky Vargas.

“Their achievements have given us a reason to believe,” dagdag pa ni Vargas.

Hindi madali marating ang Olympics, considering na 12 teams lamang ang bubuo ng LA Games 3x3 competitions.

Seeded ang US bilang host country. Automatic din papasok ang top-ranked teams sa America, Europe, Africa, Asia at Oceania.

Kung ‘di abutin ng Gilas Women ang top-ranking sa region, dadaan sila sa Olympic Qualifying Tournament – ang last  Olympic pathway.

Pero gaanon man kahirap ang daan, no turning back na ang koponan na pinamumunuan nina Afril Bernardino at Kacey dela Rosa.

“Ibabad na sa tournament iyan to earn ranking points. The goal is to make the Olympics,” ani Gilas 3x3 program director Ryan Gregorio.

Kasama sa mga tournaments na ito ang parating na Manila 3x3 Challenger – kung saan makikita ng Filipino fans live in action ang Gilas belles. Mabuhay!