Mojdeh nagningning sa Singapore swim meet

MANILA, Philippines — Nagpasiklab si World Cup campaigner Micaela Jasmine Mojdeh nang kumana ito ng tansong medalya  sa 55th Singapore National Age Group Swimming Championships na ginanap sa OCBC Aquatic Centre sa Singapore.

Hindi nagpakabog ang Behrouz Elite Swimming Team bet laban sa mala­lakas na tankers sa women’s 200m butterfly kabilang na si reigning Southeast Asian Games champion Quah Jing Wen ng Singapore.

Naglagak si Mojdeh ng dalawang minuto at 19.50 segundo sapat para masiguro ang tansong medalya habang napasakamay naman ni Quah ang ginto bunsod ng naitarak nitong 2:11.66.

Pumangalawa ang isa pang Singaporean bet na si Fann Rui Toh na nagsumite naman  ng 2:16. 28.

“I was a bit disappoin­ted with my 200m butterfly. While I improved by two seconds in the finals, I aimed for 2:15, closer to my Junior Worlds personal best. I did achieve a personal best 1:05 split for the first 100m, which is what I am happy about. I just need to sustain my back half in order to get a better splits next time,” ani Mojdeh.

Magandang exposure ito para kay Mojdeh na naghahanda para sa PAI National Tryout na gaganapin sa Agosto na magsisilbing qualifying event para sa SEA Games sa Disyembre.

May personal best si Mojdeh na 2:13 na bronze standard para sa SEA Games subalit desidido ito na mas mapaganda pa ang kanyang oras.

Maganda rin ang ipinamalas ni Mojdeh sa dalawa pang buttefly events — ang 100m butterfly at 50m butterfly kung saan nakakuha ito ng disenteng oras para magtapos sa ikaapat na puwesto.

Nagtala si Mojdeh ng 1:02.81 sa 100m butterfly na pinagreynahan din ni Quah (59.85) segundo.

Naorasan pa ang Filipino-Iranian tanker ng 28.76 segundo sa 50m butterfly kung saan namayagpag naman ang isa pang SEA Games gold medalist na si Quah Ting Wen na may 26.72 segundo.