Sabete susi sa pagresbak ng Petro Gazz

MANILA, Philippines — Dalawang buwan hindi nakalaro si Jonah Sabete dahil sa minor injury.

Ngunit nang kinailangan ng Petro Gazz ang kanyang lakas ay agad siyang sumabak sa aksyon at tumulong sa 25-19, 25-13, 28-26 pagresbak sa ZUS Coffee sa Game Two ng 2024-25 Premier Volleyball League All-Filipino Conference quarterfinals series noong Sabado.

Mismong si Japanese coach Koji Tsuzurabara ang nag-chat kay Sabete para maglaro sa Game Two.

“Sabi ko, I’ll try my 100 percent so let’s work this next game,” ani Sabete. “Iyon lang ginawa ko kasi one day lang din kami nag-prepare ng full team practice so nandoon talaga ‘yung pressure.”

Tumapos ang 31-anyos na Negrense na may 11 points sa pagganti ng Gazz Angels sa Thunderbelles para suportahan ang hinataw na 17 markers ni Fil-Am Brooke Van Sickle.

“I’m happy na nakabalik pa rin ako pero ‘yung pressure, nandoon pa rin talaga,” wika ni Sabete.

Nauna nang tinalo ng ZUS Coffee ang Petro Gazz sa Game One, 25-21, 25-23, 27-25, ng kanilang best-of-three showdown.

Pag-aagawan ng Gazz Angels at Thunderbelles ang ikaapat at huling semifinals ticket sa Game Three bukas sa PhilSports Arena sa Pasig City.

Ang mananalo ang makakasama ng nagdedepensang Creamline, Choco Mucho at Akari na kinumpleto ang two-game quarterfinals sweep sa Chery Tiggo, PLDT at Galeries Tower, ayon sa pagkakasunod.