MANILA, Philippines — Nanilat ang Wessfacckol nang manalo sa PHILRACOM Rating Based Handicapping System noong Miyerkules ng gabi sa Metro Turf, Malvar - Tanauan City, Batangas.
Ginabayan ni jockey Ryan Base ang Wessfacckol na ipinuwesto sa tersero sa largahan para panoorin ang mga matutulin sa unahan na Princess Serena at Panday Pira.
Nanatili sa unahan ang Princess Serena pagdating ng far turn at pangalawa ang Panday Pira pero lumalapit na sa kanila ang Wessfacckol kaya pagsapit ng huling kurbada ay nakakapit na ang winning horse.
Naagaw ng Wessfacckol ang bandera sa rektahan at tumuloy na ito hanggang sa finish line ng may anim na kabayo ang agwat sa pumangalawang Princess Serena, tersero ang Anyah Anyah habang pang-apat ang Princess Mamba.
Nilista ng Wessfacckol ang tiyempong 1:17.6 minuto sa 1,200 meter race sapat upang hamigin ng winning horse owner na si Adrian De Ubago ang P10,000 added prize.
Nasungkit naman ng breeder ng nanalong kabayo ang P4,000 habang P1,000 ang napunta sa second placer.