PBA Finals hitik sa drama

MANILA, Philippines — Mula sa chess match ng mga batikang coaches hanggang sa duwelo ng mga dekalibreng imports ay hitik sa anggulo at pambihirang istorya ang inaabangang 2024 PBA Go­vernors’ Cup finals tampok ang Barangay Ginebra at reigning champion na Talk ‘N Text.

At isa na dito ang friendly game off the court sa pagitan ng dalawa sa pinakamataas na opisyal na makapangyarihang PBA Board of Governors.

Magdadaupang-palad sa finals si TNT governor at PBA Board chairman Ricky Vargas kontra sa kumpareng si Alfrancis Chua, governor ng Ginebra at nakaupo bilang vice chairman ni Vargas.

“If you notice, it’s the chairman’s team and the vice chairman’s team in the finals. So, it’s very, very interesting finals for me, for the PBA and for the fans,” ani Vargas sa idinaos na pre-finals press conference kamakalawa sa The Atrium sa Enderun Colleges sa Taguig.

Subalit para sa dalawang opisyal, higit pa doon ang magiging bakbakan sa rematch ng Ginebra at TNT matapos ding maglaban noong 2023 PBA Governors’ Cup na pinagwagian ng Tropang Giga.

Isa na dito ang tagisan ng mga resident imports na sina Justin Brownlee ng Ginebra at Rondae Hollis-Jefferson na magkaribal din sa international stage, ayon kay Vargas.

Naturalized player ng Jordan si Hollis-Jefferson habang sa Gilas naman si Brownlee.

Noong nakaraang taon ay tinalo ni Brownlee at ng Gilas si Hollis-Jefferson at Jordan sa Asian Games finals para sa una nitong gintong medalya sa 61 na taon.

Bibida rin sa PBA finals ang ikapitong paghaharap nina Ginebra coach Tim Cone at TNT mentor Chot Reyes na pawang current at former head coach ng Gilas, ayon sa pagkakasunod.