Akari may pressure para manalo

MANILA, Philippines — Sa pagtatala ng 10-0 record ay mabigat ang pressure na dinadala ng Akari para tuluyan nang pagreynahan ang 2024 Premier Volleyball League (PVL) Reinforced Confe­rence.

Ito ang pilit na isasa­katuparan ng Chargers sa pagsagupa sa eight-time champions Creamline Cool Smashers sa kanilang ‘winner-take-all’ championship game ngayong alas-6 ng gabi sa Philsports Arena sa Pasig City.

Sa alas-4 ng hapon ay pag-aagawan ng PLDT at Cignal ang third place.

“Actually, kahit anong sabihin namin meron pa talagang pressure kasi nga wala pa ring talo eh,” sabi ni Akari outside spiker Gretchel Soltones.

“So kailangan every game ibigay talaga namin iyong best namin. Isa sa mindset ko talaga is bawal kaming matalo pero at the same time nag-e-enjoy pa din kami,” dagdag nito.

Kinumpleto ng Chargers ang eight-game sweep sa elimination round bago sibakin ang Farm Fresh Foxies sa knockout quarterfinals bago isinunod ang PLDT High Speed Hitters sa semifinals.

Ito ang kauna-unahang PVL championship appearance ng tropa ni Japanese coach Taka Minowa mula nang sumali sa liga noong 2022.

Pakay naman ng Cool Smashers ang pang-siyam na korona at ikatlong sunod matapos pagwagian ang nakaraang PVL All-Filipino Conference.

“We just have to work harder, we have to work together, we have to really play as one team, follow our system, follow our coaches and never lose faith,” ani veteran Michele Gumabao sa Creamline.

Samantala, hindi lalaro ang Chargers sa 2024 PVL Invitational Conference dahil sa injury ng ilan nilang player.

Sasabak sa five-team meet ang Cool Sma­shers, HD Spikers, Foxies, pu­malit sa High Speed Hitters, defending Japanese champion Kurashiki Ablaze at EST Cola ng Thailand.