Angat ang Group B
Kung makikisama ang panahon, balik ang PBA sa Smart Araneta Coliseum ngayong araw na ito.
Matapos ang ilang serye sa Ninoy Aquino Stadium, tatalon muli sa Big Dome ang Governors’ Cup action, hatid ang dalawang Group B matches.
Maghaharap sa 5 p.m. curtain-raiser ang Blackwater at Phoenix Super LPG, samantalang magsasalpukan sa 7:30 p.m. mainer ang NLEX at Barangay Ginebra.
Mas marami ang nakatutok sa Group B dahil mas matibay daw ang mga teams sa grupong ito – Rain or Shine, NLEX, San Miguel Beer, Barangay Ginebra, Blackwater at Phoenix.
Sa bagong putahe na hatid ng PBA, ang top four mula sa magkabilang grupo ay magsasalpukan sa crossover quarterfinals – Group A top seed versus Group B fourth seed, Group A second seed against Group B third seed, Group A No. 3 opposite Group B No. 2, at Group A No. 4 vs Group A No. 1.
Sa ganitong format, maaaring ang magkasamang koponan sa parehong grupo ang magharap sa finals. Maaari pa ngang four groupmates ang sama-samang umabante sa semis.
Pero mukhang suntok na sa buwan ang prospect na iyan.
Kung pagbabatayan ang mga paunang sultada, aangat sa Group B ang Rain or Shine, NLEX, San Miguel at Ginebra. Sa Group A, mukhang five-way race ang laban, habang iwan ang Terrafirma.
- Latest
