HD Spikers pumuwesto na sa semis

MANILA, Philippines —  Tinakasan ng No. 2 Cignal HD ang No. 7 Capital1 Solar Energy, 25-19, 36-34, 16-25, 22-25, 15-12, sa kanilang knockout quarterfinals match papasok sa semifinals ng 2024 Premier Volleyball League (PVL) Reinforced Conference kahapon sa FilOil EcoOil Centre sa San Juan City.

Bumanat si Venezue­lan import MJ Perez ng 34 points para sa pagmartsa ng HD Spikers sa semis matapos mabigong makasama sa Final Four ng PVL All-Filipino Conference.

Nagdagdag si Riri Meneses ng personal high 21 markers mula sa 13 attacks, pitong blocks at isang service ace habang may 16 points si Ces Molina.

“Ang good thing talaga iyong hindi kami nag-stop,” wika ni coach Shaq Delos Santos. “Ginawa talaga namin iyong best namin dahil gusto talaga naming manalo.”

Nasayang ang bagong PVL scoring record na 50 points ni Russian import Marina Tushova mula sa 47 attacks, dalawang blocks at isang ace para sa Solar Spikers na nagtala ng 1-10 marka sa nakaraang All-Filipino Conference.

Lalabanan ng Cignal sa semifinals ang magwawagi sa quarterfinal duel ng No. 3 Creamline at No. 6 Petro Gazz sa Martes.

“This is not our main target. Our main target is to get into the finals,”ani Perez.

Nakabangon ang Solar Spikers mula sa 0-2 agwat para makatabla sa 2-2 sa likod nina Tushova at Jorelle Singh patungo sa fifth set.

Ilang beses nagtabla ang dalawang koponan bago umiskor si Perez para sa 14-12 abante ng HD Spikers habang ang blangka ni Jacquie Acuna kay Tushova ang sumelyo sa kanilang panalo.