MANILA, Philippines — Hindi uuwing bokya ang Philippine swimming team dahil bitbit nito ang tatlong medalya mula sa 13th Asean Schools Games na ginanap sa Da Nang, Vietnam.
Bumandera sa ratsada ng Team Philippines si Brent International School-Manila standout Micaela Jasmine Mojdeh na kumana ng dalawang tansong medalya.
Unang umariba si Mojdeh sa girls’ 100m butterfly kung saan nagsumite ito ng isang minuto at 4.0 segundo para masiguro ang podium finish.
Sa huling araw ng bakbakan ay nagdagdag si Mojdeh ng isang tanso galing sa girls’ 200m butterfly matapos magrehistro ng dalawang minuto at 20.11 segundo.
Naduplika ni Mojdeh ang dalawang tansong medalyang nakamit nito noong 2019 Asean Schools Games sa Semarang, Indonesia.
“It was a great experience competing in the Asean Schools Games. I would like to thank everyone who supported not only me but our whole team — our parents, coaches, officials and to all who prayed for us,” ani Mojdeh na semifinalist sa 2021 World Juniors Championships sa Peru.
Galing naman ang isa pang tansong medalya kay Albert Jose Amaro II ng San Beda University.
Naorasan si Amaro ng 25.45 segundo para angkinin ang ikatlong puwesto sa boys’ 50m butterfly.