NU puntirya ang finals berth kontra FEU
MANILA, Philippines — Ibabangga ng 2023 runner-up National University sina Alyssa Solomon, Bella Belen at Vange Alinsug para tapusin at masungkit kaagad ang panalo sa pagharap sa Far Eastern University sa Final Four ng UAAP Season 86 women’s volleyball tournament ngayong hapon sa Smart Araneta Coliseum.
Dahil may tangan na ‘twice-to-beat’ incentive ang top seed sa elimination round, isang beses lang kakatayin ng Lady Bulldogs ang Lady Tamaraws.
“Kapag narinig kasi ‘yung twice-to-beat, parang nakakagaan siya sa pakiramdam ng mga players. Pero iyon nga, hindi dapat kami umabot sa puntong magagamit namin ‘yung twice-to-beat,” wika ni Belen.
Inilista ng NU ang 12-2 karta at nasa tuktok sila ng team standings kung saan ay mabibiyayaan ng bonus ang top two teams pagkatapos ng 14-game eliminations.
Nasikwat ng University of Santo Tomas ang isang insentibo matapos lumanding sa No. 2 sa elims at lalabanan nila ang nagdedepensang La Salle sa semis.
Liyamado sa laban ang NU dahil tinalo nila ang FEU sa first at second round ng elims.
Magsisimula ang kanilang paluan sa alas-4 ng hapon.
Noong Miyerkules ay winalis ng Lady Bulldogs ang Lady Tams sa tatlong sets matapos magsanib-puwersa sina Solomon, Belen at Alinsug na nagtala ng 13, 12 at 11 markers, ayon sa pagkakasunod.
Mainit na team ang NU dahil sa pagwalis ng lahat ng nakatunggali sa second round kaya tiyak na kakapitan din nila ang momentum.
Tiyak naman na hindi magre-relax ang Lady Bullodgs sapagkat alam nilang may bangis ang Lady Tamaraws.
Sasandalan ng FEU ang mga tigasin nilang attackers na sina Faida Bakanke, Chenie Tagaod at Gerzel Petallo.
- Latest
