San Beda may pag-asa pa
MANILA, Philippines — Malaki pa rin ang tsansa ng San Beda University Lady Red Spikers na makasampa sa final four matapos nilang kalusin ang Jose Rizal University Lady Bombers, 17-25, 25-20, 22-25, 25-17, 15-5 sa NCAA Season 99 women’s volleyball tournament na nilaro sa Filoil EcoOil Centre kahapon.
Nasa pang seventh place ng team standings ang Lady Red Spikers hawak ang 3-4 record habang kasalo ang Lady Bombers sa eighth place kasama ang San Sebastian College-Recoletos na may tig-1-6 cards.
Halimaw sa opensa si Angel Mae Habacon matapos nitong irehistro ang game-high 36 points mula sa 31 attacks at limang service aces para itakas ang San Beda sa limang sets.
Nakatuwang ni Habacon sa opensa sina Michela Sophie Cagalawan, Kleinerross Abraham at Erin Feliz Navarro na umiskor ng 20, 7 at 7, ayon sa pagkakasunod.
Muntik ng sumadsad ang San Beda matapos silang maungusan ng Kalentong-based squad ng isang sets pero naging matatag ang una para makuha ang set four at makahirit ng deciding fifth set.
Lumabas ang bangis ng Lady Red Spikers sa fifth frame, umarangkada agad sa simula ng paluan para tapusin ang laro sa 15-5 panalo.
Samantala, nagwagi sa unang laro ang two-time defending champions College of Saint Benilde Lady Blazers laban sa University of Perpetual Help System DALTA, 25-14, 25-18, 25-7.
- Latest
