MANILA, Philippines — Humirit pa ang Behrouz Elite Swimming Team (BEST) Philippines ng dalawang ginto at isang pilak sa pagpapatuloy ng 58th Malaysia Invitational Age Group Swimming Championships sa National Aquatic Center Kuala Lumpur Sports Complex sa Bukit Jalil.
Ayaw paawat ni Brent International School standout Micaela Jasmine Mojdeh nang pagreynahan ang girls’ 15-17 200-meter butterfly.
Naisumite ni Mojdeh ang bilis na dalawang minuto at 19.60 segundo para igupo sina silver medalist Jia Jia Yoong ng Malaysia (2:23.37) at bronze medalist Shakthi Balakrishnan ng India (2:23.38).
Maliban sa ginto ay humirit pa si Mojdeh ng pilak na medalya sa 200m breaststroke matapos magrehistro ng 2:45.44.
Napasakamay ni Rouxin Tan ng Malaysia ang ginto tangan ang 2:37.09, habang pumangatlo si Gusti Ayu Made ng Indonesia na may 2:45.46.
Sa kabuuan ay may tatlong ginto at dalawang pilak na medalya na si Mojdeh matapos ang third day ng kumpetisyon.
Nauna nang nakaginto ang Philippine national junior record holder sa 400m Individual Medley (5:07.42) at 100m butterfly (1:03.23) at nakapilak sa 200m IM (2:25.37).
Muling bumanat si Lucena City pride Yugo Cabana ng ginto sa boys’ 11-12 200m butterfly sa itinalang 2:25.75 para talunin sina Malaysians Zhen Kok Yap (2:27.29) na nagkasya sa pilak at Saw Huai Ching (2:28.40) na umani naman ng tanso.
Sa kabuuan ay may limang gintong medalya na ang Pilipinas sa naturang torneo.