MANILA, Philippines — Mainit na sinimulan ng reigning champion China at powerhouse Japan ang kampanya nito matapos ilampaso ang kani-kanyang karibal sa 2022 AVC Cup for Women kahapon sa Philsports Arena sa Pasig City.
Walang sinayang na sandali ang Chinese squad nang ilatag nito ang matatalim na atake at solidong net defense para mabilis na pataubin ang South Korea sa pamamagitan ng 25-9, 25-8, 25-9 demolisyon.
Nasa tuktok ng Pool A ang China tangan ang 1-0 rekord habang bagsak sa 0-1 ang South Korea.
Sunod na makakaharap ng China ang Vietnam ngayong araw sa ala-una ng hapon habang sasagupain naman ng South Korea ang Iran sa alas-7 ng gabi.
Sa kabilang banda, winalis ng Japan ang Southeast Asian Games champion Thailand sa bendisyon ng 25-18, 25-19, 25-22 desisyon para makuha ang liderato sa Pool B.
Umangat ang Japan sa 1-0 marka samantalang lumasap naman ng unang kabiguan ang Thailand.
Samantala, hindi pinalad ang Creamline Cool Smashers sa unang pagsalang nito matapos lumasap ng 19-25, 17-25, 29-31 desisyon laban sa SEA Games silver medalist Vietnam.
Nahulog ang Cool Smashers sa 0-1 marka habang umangat ang Vietnam sa 1-0 kartada.
May tsansa ang Pinay Spikers na makapagpahinga dahil wala itong laro sa araw na ito.