MANILA, Philippines — Naitakas ni Jason Brickman at ng Kaohsiung Aquas ang 101-99 panalo kontra kababayang si Jordan Heading at sa Taichung Suns sa Game One ng T1 League best-of-five finals sa Fengshan Gymnasium sa Taiwan.
Muntik masayang ng Kaohsiung ang malaking bentahe sa fourth quarter bago isalba ni Brickman na nasawata si sniper Hu Long-mao sa huling tatlong segundo para sa game-winner.
Nagtala si Brickman ng double-double na 19 points at 14 assists sahog pa ang 8 rebounds at 3 steals para sa 1-0 lead ng Aquas sa kanilang serye ng Suns.
Sumuporta kay Brickman si Hu na may 26 markers habang may tig-13 points din sina Mindaugas Kupsas at Ferrakohn Hall para sa No. 1 seed na Kaohsiung.
Kontrolado ng Aquas ang buong laro sa minamandong double-digit lead kabilang na ang komportableng 97-88 abante sa huling anim na minuto.
Subalit nagising ang Suns nang magliyab sa 11-2 run upang sikwatin ang 99-98 abante mula sa jumper ni Anthony Tucker sa huling 46 segundo bago namayani sina Brickman at Hu para sa Aquas.