PNSTM IDs para sa 20% discount makukuha na ng mga national athletes

MANILA, Philippines — Inaasahang bago matapos ang buwan ay nakuha na ng higit sa 1,000 qualified national athletes at coaches ang kanilang mga Identification Cards (PNSTM ID) at booklets para sa 20% discount sa iba’t ibang establisyemento.

Magagamit nila ang nasabing diskuwento sa mga transportation, hotels at restaurants, pagbili ng gamot at leisure activities.

“We have always been supportive of our athletes and coaches and we hope this privilege help in easing their burdens caused by COVID-19,” sabi ni Philippine Sports Commission (PSC) chairman William ‘Butch’ Ramirez.

Nagpadala ang sports agency ng dalawa sa tatlong batches ng booklets para makuha ng mga national athletes at coaches ang nasabing 20% discount.

Ito ay nakabase sa Republic Act 10699 o ang “National Athletes and Coaches Benefits and Incentives Act (Republic Act 10699).”

Mabilis na kumilos ang PSC para makapaglabas ng Identification Cards (PNSTM ID) at booklets para sa lahat ng qualified national team members.

Ilan sa mga national athletes na nakatanggap ng kanilang ID at booklets ay sina 2019 AIBA Women’s World Boxing Championships gold medalist Nesthy Petecio at Olympian Marathoner Mary Joy Tabal.

“Thank you PSC! Unexpected delivery! May 20% discount na ako nito,” post ni Petecio sa Facebook.

Dahil sa coronavirus disease (COVID-19) ay nadiskaril ang pagbibigay ng PSC ng mga IDs at booklets para sa 20% discount ng mga national athletes at coaches.