MANILA, Philippines — Nasungkit ni Zoren James Aranas ang ikatlong korona sa taong ito matapos pagharian ang 2019 Beasley Custom Cues 9-Ball Open na ginanap sa Brass Tap and Billiards sa Raleigh, North Carolina.
Nairehistro ni Aranas ang 13-10 desisyon laban kay Skyler Woodward ng Amerika sa finals para masungkit ang $5,200 prem-yo. Nagkasya sa $3,250 konsolasyon si Woodward.
Maganda ang simula ni Aranas nang sunud-sunod nitong payukurin sina Dennis Orcollo sa first round (9-8), David Tickle ng Amerika sa second round (9-4), Dmitris Loukatos ng Greece sa third round (9-0), Brad Shearer ng Amerika sa fourth round (9-7) at dating world champion Francisco “Django” Bustamante sa fifth round (9-4).
Subalit naputol ang matikas na kamada ni Aranas nang yumuko ito kay Woodward sa sixth round sa iskor na 4-9 para mahulog sa losers’ bracket ng torneong nagpatupad ng double-elimination format.
Sa losers’ bracket, muling tinalo ni Aranas si Bustamante (7-4) para maisaayos ang rematch kay Woodward sa championship game.
Nagtapos naman sa ikatlong puwesto si Bustamante para makasiguro ng $2,050 premyo habang ikapito naman si Roberto Gomez ($525) at ikasiyam naman si Orcollo ($315) para makatanggap din ng kani-kanyang konsolasyon.
Nauna nang nagkampeon si Aranas sa 2019 Super Billiards Expo- Diamond Open 10-Ball Pro Players Championship noong Marso sa Oaks, Pennsylvania kung saan tumanggap ito ng tumataginting na $10,000.
Naghari rin si Aranas sa 3rd Annual Barry Behr-man Memorial Tournament noong Abril sa Virginia Beach sa Virginia, USA.