MANILA, Philippines – Nagptuloy ang magandang paglalaro ng mga baguhan para ibigay sa UP Lady Maroons ang ikalawang sunod na panalo sa 25-20, 25-22, 27-25 kontra sa Coast Guard Lady Dolphins sa Shakey’s V-League Season 12 Reinforced Conference kahapon sa The Arena sa San Juan City.
Si Maria Isabel Molde ay mayroong 11 kills at apat na aces, habang si Justine Dorog ay may 8 kills at 2 aces para punuan ng dalawa ang pagkakaroon ng tig-limang puntos ng mga beteranang sina Nicole Tiamzon at Kathy Bersola.
Sa ikatlong set napalaban nang husto ang Lady Maroons pero naipakita nila ang laro ng isang beteranang koponan para biguin ang Lady Dolphins na makatikim ng set win sa ikatlong laro sa ligang inorganisa ng Sports Vision katuwang ang Shakey’s at handog ng PLDT Home Ultera.
Ang atake ni Samantha Dawson ang nagtulak sa Coast Guard sa set point, 24-23, ngunit hindi pumayag ang UP na matapos ang laro at binutata ni Diana Mae Carlos si Hyrize Macabuhay para sa 24-all.
Nagtabla ang dalawang koponan sa 25-25 bago pumasok ang down-the-line hit ni Molde, habang si Abegail Ponon ay tinawagan ng two-touch para kunin ng UP ang ikalawang sunod na panalo.
Patuloy ang pangangapa ng Lady Dolphins at si Rossan Fajardo lamang ang nasa double-digits para sa kanyang koponan.
Tinalo ng UP ang Coast Guard sa lahat ng departamento.