MANILA, Philippines - Isasagawa ng mga PBA officials ang kanilang planning session sa Incheon, Korea simula bukas at sasamantalahin din nila ang pagkakataong makapagbigay ng suporta sa mga Pinoy Athletes sa Asian Games.
Nauna nang nagtungo sina PBA commissioner Chito Salud at media bureau chief Willie Marcial sa Korea noong Biyernes kasunod si PBA chairman Patrick Gregorio ng hapon. Ang mga PBA Board of Governors at executive staff ay aalis bukas.
Ayon kay Salud, magiging abala ang mga opisyal sa pagpaplano ng 40th anniversary programs at celebrations ng liga, pagrerebisa ng conference formats at rules para mapaganda ang laban at fan interest, pagrerebisa sa suportang ibibigay ng liga sa Gilas, pagpapalakas sa PBA D-League, pagdadala ng liga sa ibang lugar at ang team membership expansion policy.
Ayon kay Marcial, kasama na sa planning session ang mga kinatawan ng mga bagong PBA teams na NLEX, Blackwater at Kia Motors.
Kasama sa plano ang panonood ng mga laro ng Gilas ngunit matatapos na ang kanilang quarterfinals assignment ngayon laban sa Kazakhstan matapos sibakin ng Korea kahapon.