UAAP tutulong din sa Yolanda victims

MANILA, Philippines - Bubuksan ng University Athletic Association of the Philippines (UAAP) ang mga aksyon sa Season 76 second semester sa pamamagitan ng pagbibigay ng donasyon sa mga biktima ng bagyong ‘Yolanda’ sa opening ceremony para sa volleyball sa Disyembre 1 sa Smart Araneta Coliseum.

Sa Nobyembre 30, makikipagtulungan ang Season 76 host Adamson University sa Malolos City local go-vernment sa pamamagitan ni Mayor Christian Natividad para sa isang fund-raising exhibition basketball match sa pagitan ng Soaring Falcons at ng Philippine Basketball Association Legends na babanderahan nina ex-Adamson stars Kenneth Duremdes at Marlou Aquino.

Ang malilikom na pondo sa event na nakatakda sa alas-6 ng gabi sa Malolos City gym ay ibibigay sa mga Yolanda victims.

Angkop na seremonya para sa volleyball competitions ang itinakda ng UAAP, ngunit ayon kay Season 76 secretary-treasurer Malou Isip ng Adamson University, ibibigay ng liga ang P300,000 sa Sagip Kapamilya ng ABS-CBN.