MANILA, Philippines - Nakitaan ng mas mainit na paglalaro ang La Salle Dasmarinas at Adamson upang manaig sa San Sebastian at Perpetual Help ayon sa pagkakasunod sa pagtatapos ng Shakey’s V-League Season 10 First Conference elimination kahapon sa The Arena sa San Juan City.
Nasayang ang 22 hits ni Jeng Bualee dahil sa mas magandang team work na naipakita ng Lady Patriots para tapusin ang laro sa Group A bitbit ang 2-2 karta at nalagay sa ikatlong puwesto.
Sina Iari Yongco, Mariel Desengano at Monique Tiangco ay gumawa ng 14, 10 at 10 hits para sa La Salle Dasma na kuminang sa depensa sa kinamadang 12 block bukod pa sa 3-1 bentahe sa service aces.
Tinapos ng Lady Stags ang di magandang laro sa eliminasyon sa ligang inor-ganisa ng Sports Vision at suportado ng Shakey’s, taglay ang 1-3 karta at nawalang saysay ang 44-42 kalamangan sa attack points dahil may tatlong blocks at isang ace lamang ang koponan.
Hindi nagpahuli ang Lady Falcons na hiniritan ang NCAA champion na Perpetual Help ng 25-11, 25-19, 20-25, 25-16 panalo sa ikalawang laro sa ligang may ayuda pa ng Accel at Mikasa.
Kontrolado ng Lady Falcons ang net game sa kinuhang 50-36 bentahe sa spikes at 11-4 sa blocks. Mayroon din silang nakuhang 29 puntos sa errors ng Lady Altas na tinapos ang laro sa Group B sa 1-3 baraha.
Sa quarterfinals, ang magkakasama sa Group I ay ang mga walang talong Ateneo at NU bukod pa sa La Salle Dasma at Arellano habang nasa Group II ang San Sebastian, Perpetual, UST at Adamson..
“Ipinag-utos ko lamang sa mga bata na huwag mawalan ng composure. Kailangan din na hindi kami bibigay sa depensa lalo na sa hustle,†wika ni Lady Patriots coach Darwin Campana.
Dahil bibitbitin ng mga teams ang panalo-talo karta sa mga kasamang teams na aabante sa quarterfinals, lalabas na ang Ateneo at NU ay mayroong 1-0 karta dahil tinalo nila ang La Salle Dasma at Arellano na magkakaroon ng 0-1 baraha. Sa kabilang banda, ang UST at Adamson ang may 1-0 baraha sa San Sebastian at Perpetual Help. Single round kada grupo uli ang mangyayari at ang mangungunang dalawang koponan ang aabante sa semifinals.