Western Visayas, NCR athletes kinuha ang unang ginto sa Palaro

DUMAGUETE CITY, Philippines – Inangkin nina Jeremay Rubias at Renzy John Ge­molaga ng Western Vi­sayas at Jan Resty Lo­renzo ng National Capital Region ang unang mga gintong medalya sa pag­sisi­mula ng 2013 Pala­rong Pambansa kahapon sa Gov. Mariano Perdices Me­morial Stadium.

Naghagis ang 15-an­yos na si Rubias ng 39.59 metro para kunin ang gold medal sa secondary girls’ javelin throw at ungu­san sina Rizalyn Apos (37.89m) ng Caraga at Jo­velyn Notario (36.05m) ng Cagayan Valley.

Ito ang unang gold me­dal ni Rubias sa natu­rang annual multi-sports meet para sa elementa­ry at secondary athletes ma­tapos kumuha ng silver sa elementary division sa 2011 Palarong Pambansa sa Tarlac City.

Isinuko ni Rubias ang kanyang pagiging star­ting center ng Western Vi­sayas’ women’s basketball team para tutukan ang javelin.

Nagtapon ang 17-an­yos na si Gemolaga ng 13.65m para angkinin ang ginto sa shot put event at daigin  sina Central Luzon bet Bryan Jay Pacheco (13.37m) at NCR pride Gar­ry Santiago (13.36m).

Kagaya ni Rubias, ito rin ang unang high school gold medal ni Gemolaga matapos kumuha ng silver sa elementary division sa Tacloban City.

Ang 15-anyos namang si Lorenzo ng NCR ang na­ngibabaw sa secondary boys long jump sa kanyang nilundag na 6.66-m pa­­ra ungusan sina Rafa­el Bueno (6.55m) ng Bicol at Lord John Roilo (6.52m) ng Davao.

Nagtala naman ng mga panalo ang NCR, Ca­labarzon, Central Visa­yas at Wes­tern Visayas sa bas­ketball event.