Texters lalabanan ang Painters sa finals

MANILA, Philippines - Hindi na pinayagan ng Tropang Texters na ma­kapuwersa ng Game Seven ang Aces.

Binigo ng nagdedepensang Talk ‘N Text ang Alaska, 83-78, sa Game Six ng kanilang semifinals series para sikwatin ang ikalawang finals berth pa­ra sa 2012-2013 PBA Philippine Cup kagabi sa Cuneta Astrodome sa Pasay City.

 Winakasan ng Tropang Texters ang kanilang best-of-seven semifinals show­down ng Aces sa 4-2 para makaharap sa best-of-seven championship se­ries ang Rain or Shine Elasto Painters.

Magsisimula ang titular duel ng Talk ‘N Text at Rain or Shine sa Miyerkules sa Smart Araneta Coliseum.

Mula sa 64-62 abante sa third period, kinuha ng Talk ‘N Text ang 76-69 kalamangan sa 6:22 sa fourth quarter buhat sa isang three-point shot ni Jared Dillinger.

Huling nakadikit ang Alaska sa 75-80 galing sa isang four-point play ni JVee Casio buhat sa foul ni Jimmy Alapag sa 3:47 nito.

Samantala, naniniwa­la si Rain or Shine head coach Yeng Guiao na may pag-asa silang manalo ng pangalawang sunod na kam­peonato.

Tinapos ng Rain or Shine ang San Mig Coffee, 4-2, para ma­kapasok sa kanilang unang PBA All-Filipino Fi­nals.

“This is a much younger team. We’re co­ming off a championship and our players are all heal­thy. Tingin ko malaki ang tsansa,” pahayag ni Guiao.

Huling nakapasok si Guiao sa isang All-Filipino Fi­nals noong 2006 nang ma­talo ang Red Bull sa Pure­foods.

Natalo din ang kanyang Sarsi kontra sa Pure­foods din 3-2 sa best-of-five series ng 1991 All-Filipino Confe­rence.

Talk ‘N Text 83 - Castro 16, Alapag 15, Dillinger 11, Williams 11, De Ocampo 11, Carey 6, Fonacier 5, Peek 5, Reyes 3, Raymundo 0, Aban 0.

Alaska 78 - Abueva 23, Espinas 13, Thoss 11, Casio 10, Hontiveros 7, Baracael 6, Jazul 5, Baguio 3, Dela Cruz 0.

Quarterscores: 25-18; 42-41; 64-62; 83-78.