Dear Vanezza,
Ako po si Leng, may bf ako, nag-aaral siya at 2 years na lang po bago makatapos. Mahal na mahal ko po siya at mahal niya rin ako. Kami lang dalawa ang nakakaalam sa aming relasyon, 6 months na kami.
Hanggang nabuking na magsyota nga kami. Ngayon nalaman ng magulang niya. Nagalit sila dahil baka raw hindi siya makatapos sa pag-aaral.
Hindi rin daw ako bagay sa anak nila dahil siya raw ay may pinag-aralan samantalang ako ay wala. Tama sinabi ng nanay niya dahil hindi ako nakatapos ng high school kaya pilit ko siya ng kakalimutan kahit masakit. Sana matulungan n’yo ako.
Dear Leng,
‘Wag kang malungkot kung hindi man naging maganda ang pagtingin sa’yo ng mga magulang ng bf mo.
Sa isang banda, hindi mo sila masisi dahil maaaring mataas ang pangarap nila sa kanilang anak at natatakot sila na hindi siya makatapos ng pag-aaral kung maagang makikipagrelasyon.
Sa halip masaktan, bakit hindi mo rin ipagpatuloy ang iyong pag-aaral? Gawin mong challenge ang “paghamak” na ito sa’yo. At habang nag-aaral ang bf mo, ituon mo ang iyong panahon sa mga bagay na magpapaunlad ng iyong kaalaman. At ito ang patunayan mo sa kanila.
Sumasaiyo,
Vanezza