Dear Vanezza,
Limang taon na mula ng namatay ang asawa ko. Naiwan niya sa akin ang aming anak na babae na 13 yrs. old na ngayon. Mayroon akong bf. Matanda siya sa akin ng 12 years pero mayaman at responsable. Sinagot ko siya for practical reasons. Para may makatuwang ako sa buhay at mabigyan ng magandang kinabukasan ang aking anak. Ang problema ay ayaw ng anak ko na mag-asawa akong muli. Sinabi ko ito sa bf ko at naunawaan naman niya. Handa raw siyang maghintay hanggang sa makumbinsi ang anak ko. Pero naaawa rin ako sa bf ko na gusto nang lumagay kami sa tahimik dahil nagkaka-edad na siya. Ano ang gagawin ko? - Molly
Dear Molly,
Kaunting tiyaga ang kailangan. Dapat, ang bf mo ang gumawa ng paraan para mapalapit sa iyong anak. Kaibiganin niya nang husto ang iyong anak at ipakitang karapat-dapat siyang maging pangalawang ama. Hindi makukuha ang problema mo sa pilitan. Sariwa pa sa anak mo ang alaala ng kanyang ama. I’m sure lalambot din ang damdamin ng iyong anak kaya ‘wag n’yo siyang madaliin.
Sumasaiyo,
Vanezza