Gustong kunin ng mister ang anak sa ibang babae

Dear Vanezza,

Ako po’y hindi na magkakaanak mula ng malaglag ang sanggol na dinadala ko noon. Ngayon po ay iminungkahi sa akin ng aking mister na kupkupin namin ang kanyang anak sa dati niyang nobya. Pupunta na sa Amerika ang kanyang ex-gf at iiwan ang bata sa mga magulang ng babae. Gusto ng mister ko na kunin niya ito dahil siya naman ang ama. Mas bata sa akin ang aking asawa pero sa kabila nito ay naging tapat siya sa akin. Batid ko na sinusustentuhan niya ang bata noon pa. At ngayong humihingi siya ng pabor ay naguguluhan ako. Mabigat ito sa loob ko pero hindi na ako magbubuntis at nais ko maging maligaya ang mister ko. Ano pong mapapayo mo? - Loda

Dear Loda,

Hindi masamang kunin ninyong mag-asawa ang anak ng mister mo sa ibang babae ngayong nangangailangan ang bata ng kakalinga sa kanya. Ang asawa mo kamo ang sumusustento sa bata kaya hindi maipagkakaila na mahal niya ang anak niya dahil hindi niya kinakaligtaan ang responsibilidad niya rito. Lawakan mo ang iyong pang-unawa. Para sa kaligayahan ng iyong mister, subukan mong maging ina sa bata. Huwag mong ipagkait na mapalaki ang bata ng sarili niyang ama. Nasa sa’yo pa rin ang desisyon. 

Sumasaiyo,

Vanezza