Dear Vanezza,
Ako po’y 20 years old at may asawa na. Bata ako ng mag-asawa. Ako’y 18 years old noon samantalang ang napangasawa ko ay 20 years old. Nagtanan lang kami dahil sa aming kapusukan. Nagalit sa akin ang mga magulang ko dahil hindi ako nakatapos ng pag-aaral. Parang nagsisisi ako ngayon. Madalas kaming nag-aaway ng asawa ko dahil sa kakapusan ng pera. May one-year old son na kami at madalas pang magkasakit dahil sa kakulangan ng tamang nutrisyon. Isa lamang driver ng tricycle ang asawa ko at ang kinikita niya ay kulang na kulang sa aming pangangailangan. Ang kondisyon ng mga magulang ko ay makakabalik lang ako sa amin kung iiwanan ko ang lalaking kinakasama ko ngayon. Dapat na ba akong sumuko? - Ema
Dear Ema,
Mag-usap kayo ng ka-live-in mo. Ipaliwanag mo sa kanya ang sitwasyon dahil ang pinag-uusapan diyan ay ang survival ng isang inosenteng bata na inyong anak. Marahil, puwede kayong maghiwalay muna at hikayatin mong magpatuloy kayong pareho ng pag-aaral alang-alang sa inyong magandang kinabukasan. Mga bata pa naman kayo at hindi pa huli ang lahat upang ituwid ang isang pagkakamaling bunga ng kapusukan. Kapag may matatag na kayong kabuhayan, puwede na kayong magpakasal at magsama muli.
Sumasaiyo,
Vanezza