Dear Vanezza,
Nagkaroon ako noon ng girlfriend. Para sa akin siya ang pinakamagandang babaeng nakilala ko. Sa loob ng 3 taon nagkaroon kami ng relasyon at nagmahalan nang lubos. Ang akala ko noon, wala nang katapusan ang aming kaligayahan. Isang araw, pinuntahan ako ng isang kaibigan at sinabing naholdap at napatay ang nobya ko. Agad akong sumugod sa ospital, subalit hindi ko na siya inabutang buhay. Hindi ko ito matanggap. Umiyak ako nang umiyak. Mula ng mamatay ang mahal ko, iyon na ang simula ng panibagong kalbaryo ng buhay ko. Nalulong ako sa bawal na gamot para makalimot sa kasawian ng aking pag-ibig. Parang nawalan na ng direksiyon ang buhay ko nang mawala siya. - Natoy
Dear Natoy,
Sana’y matanggap mo na ang buhay ng lahat ng tao sa mundo ay pahiram lang sa atin ng Dakilang Lumikha. Marahil, kung buhay pa ang mahal mo, hindi niya nanaisin na maligaw ka ng landas. Sa pagyao niya, ang buhay mo ay dapat na magpatuloy. Hindi ka dapat na nagwawala. Magnilay-nilay ka nang husto at bagaman hindi mo kailangang limutin ang yumao mong kasintahan, dapat na maging matatag ang paninindigan mo na ang magandang alaala ng inyong pagsasama ay hindi dapat na malambungan ng masamang gawain. Makakatagpo ka rin ng babaeng mamahalin mo ng lubos at magmamahal din sa iyo sa kabila ng pinagdaanan mong karanasan kaya wag kang mawalan ng pag-asa.
Sumasaiyo,
Vanezza