Maris, mabenta sa Palm Spring Filmfest!

Muling nagparamdam ang Kapamilya actress na si Maris Racal sa social media matapos ang kinasangkutan nilang kontrobersya ng ka-loveteam na si Anthony Jennings.

Ilang linggong nanahimik si Maris matapos ang intriga sa kanila ni Anthony kung saan ipinost ng ex ng aktor, na si Jam Villanueva, ang mga screenshot ng landian ng dalawa.

Naglabas sila ng pahayag at humingi ng tawad pero hindi pa rin sila tinantanan ng mga basher.

Pansamantalang nag-deactivate si Maris ng kanyang official Facebook account sa kasagsagan ng issue para makaiwas diumano sa mga pamba-bash ng mga netizen.

Hindi rin sumama ang dalawa sa mga promo ng kinabibilangan nilang pelikula na And The Breadwinner Is… na kalahok sa Metro Manila Film Festival.

Hindi rin dumalo ang aktres sa Christmas party ng upcoming seryeng pinagbibidahan nina Richard Gutierrez at Daniel Padilla na Incognito na dinaluhan naman ni Anthony.

Kumalat ang video ni Anthony na nagpa-party pero tila mas pinili ni Maris na mamundok kesa makita ang ka-loveteam.

Pero ngayon nga ay nagparamdam na ulit ito sa kanyang Instagram account para mag-promote ng kanyang pelikula na Sunshine na may caption na “Hello, Palm Spring International Film Festival!

“Get your tickets now.”

Mapapanood ang pelikula niya nang apat na araw at mababasa sa post ng director ng pelikula na si Antoinette Jadaone na sold-out na ang unang dalawang araw nito.

Sa kabila nga ng kontrobersiyang kinasangkutan ni Maris ay wala pa rin daw duda na magaling itong aktres at laking tuwa ng mga tagahanga niya na unti-unti na ulit itong nagpapakita sa social media.