Boatwright pasok sa sistema ng Gilas Pilipinas

MANILA, Philippines — Swak si Bennie Boatwright sa sistema ng Gilas Pilipinas kaya’t todo ang pagsulong ng Samahang Basketbol ng Pilipinas (SBP) para maging naturalized player ito.

Sa katunayan, inihahalintulad ni SBP president Al Panlilio si Boatwright na bigger version ni Justin Brownlee — ang kasalukuyang naturalized player ng Gilas Pilipinas.

Kasalukuyang nasa bansa si Boatwright upang asikasuhin ang mga dokumento sa kanyang natura­lization.

Nakipagkita na ito sa mga opisyales ng SBP kabilang na si Panlilio kasama sina Gilas head coach Tim Cone, team manager R­ichard del Rosario at SBP executive director Erika Dy.

“I told him [Boatwright] that he’s a bigger, younger version of Brownlee. He’s very excited to be chosen, to be part of the Gilas journey,” ani Panlilio.

Sariwa pa si Boatwright sa matagumpay na pagkopo ng kampeonato sa PBA Season 48 Commissioner’s Cup kasama ang San Miguel Beer.

Malalim na ang karanasan ni Boatwright.

Bukod sa PBA, nakapaglaro na ito sa Mexico, China at iba’t ibang liga sa Amerika.

Sa oras na maging na­turalized player na si Boatwright, magiging kapalitan nito sina Brownlee at Angelo Kouame para sa mga FIBA international tournaments.